الكشرة الأردنية

طبعا زي ما بتعرفو الشعب الاردني هو الشعب المميز والمعروف بين كل شعوب العالم بالكشرة الاردنية ... بيصحى الواحد فيهم الصبح من النوم بكون بوزه قالب شبرين ونص وتلات ارباع يعني 3اشبار وربع .... "آل يعني انا مش منهم" ... وبكونو حواجبو ضاربين ببعض, و تكون معالم الوجه تدل على الغضب و القرف و العصبية مع وجود شرارة حمراء شديدة اللهجة خارجة من الأعين ... و تزول الكشرة بعد الحصول على سيجارة و كاسة قهوة سادة او تحت الوسط .. و المتميز فينا ليس كوننا مكشرين في كتير شعوب مكشرين في العالم لكن المتميز فينا هو طريقة التكشير التي لن و لم نجد كمثلها كشرة ...





طبعا و انت رايح على الدوام الصبح كتير ناس بكل برائة بيقدمو ابتسامة لهذا الوجه الجميل " ابو بوز " .... طبعا الرد بيكون يا اما زيادة الكشرة لدرجة انشقاق بشرة الوجه يا اما بيقول القول المأثور ... " في اشي ابو حميد بتظحك ؟؟؟؟ " مع انو السؤال لازم يكون العكس انو في اشي مكشر ؟؟؟ ... و في قول اخر مأثور يقال في هذه المواقف ... " في اشي بتتطلع ابو حميد ؟؟؟ مظيع بريزة بوجهي ؟؟؟ .... و تنتهي القصة بصياح و هت و حفلة اسف ... و برجع بحكي يا خوان احنا شعبنا بحب السهر عشان هيك بصحى نعسان و تعبان عشان هيك بكون مكشر مش اكتر ... يا خوان عملو بسة اردنية و بسة لبنانية من ورى هالموضوع الي مش كاين يخلص ...




اي والله العظيم اشي بجلط ... مرة كنت قاعدة على التلفزيون و عم أحضر برنامج بحكي عن الابتسامة و فوائدها في الحياة اليومية و النفسية و الجسدية ... فقلت خليني ابتسم و الابتسامة في وجه اخيك صدقة ... و انا رايحة على الامتحان طبقت القاعدة " ابتسمي يختي ابتسمي " و ما خليت بنت بعرفها ما بعرفها الا و ابتسمت في خلقتها ... ولا تورطت مع وحدة دبدوبة " بدي جارد " كانت بدها تخبصني خبص صارت تحكيلي ... ليكون مش عاجبك ؟؟؟ .... انا طبعا اختصرت و قلتلها لا ما في اشي انا اسفة ... حكتلي لا ليكون في اشي ؟؟؟ ... و انا حسيت حالي في مدرسة شباب صارو البنات يحكو طوشة طوشة طوشة ... وحدة صارت تحكي اضربيها ما تسكتيلها .... و انا ضليت مختصرة لحد ما مرقت المشكلة على خير ... والله مش خوف بس بلا ما نحمل المادة !!!!! طبعا خلصت الامتحان و روحت على البيت و ما سمحت للكشرة انها تتغلب علي !! بالعكس روحت بضحك و مبتسمة على البيت و امي شافتني و حكتلي ... شو في مالك ريتو يسلملي الهبل !!!! شوفو كيف المبتسم ببين هون ؟؟؟



يعني خلاصة الكلام يا عالم ... احنا ليش معطين هاي الفكرة عنا ؟؟؟ والله انو في كتير اردنيين بيجننو و معظمهم بيجننو و ضحوكين و لزيزين و خفاف دم ... فخلينا نمشيها بدون الكشرة الصباحية و نفرجي العالم انو الشعب الاردني ما في منو لانو فعلا مافي منو ... يعني ازا في هبيلة بيضحك في وجهك الصبح خدو على قد عقلو و اضحك في وجهو ...

ههههههههههه
فعلا معك حق ليه الناس على طول مكشرين وعابسين ما بعرف.. تقول انه حامل هموم الدنيا ع كتافه
اشكرك على هذا الطرح الجميييل

والله معك حق لازم تضحك وتبتسم بلا من الكشرة والغم بس والله يا عمي الكشرة لابقة لانا الرجال احنا لانه هيك بتبين الرجولة صح هههههههههههههههههههههههههههههههههههههه

لا لا لا لا لا لا انا بعارضك وبشدة الكشرة ما إلها علاقة بالرجولية
بالعكس اصلا هادا بعتبره هبل مع احترامي لكل جنس آدم..
شو بسير ع الناس ازا ضحكت والله ما بعرف>>> اضحكوا مش ماخدين معاكم شي

شو يا جلنار والله بمزح وليش كل شي بتخودية على محمل الجد
هههههههه

لا انا ما باخد كل شي بجد...
اشكرك مرة اخرى
هههههههههههههههههههههههههه>>> لحتى الكل يبقى يضحك

هههههههههههههههههههههههههه هيك ولا بلاش